हात उगारता मनामनामध्ये विष पेरती हेच हात ।
स्मित हास्याचे हात जोडता प्रेम भरती हेच हात ।
गोर गरिमा अबालवृध्दा मदतीसाठी हेच हात ।
गुणवंतांचे कौतुक करण्या पाठीवर मग हेच हात ।
लाचारीत भिक मागण्या पुढे पसरती हेच हात ।
सबल हाताने दान देण्या पुढे धावती हेच हात ।
दोन्ही हाताने टाळी वाजण्या काम करती हे हात ।
राग संतापात कान शिलावर जाऊन बसती हेच हात ।
राखी आणि कंकणसाठी शोभून दिसती हेच हात ।
शुभ प्रसंगी पुजनासाठी सरसावती मग हेच हात ।
आपला हात जगन्नाथ मग उदर भरण्या हे हात ।
संसार रूपी भवसागर तरूण जाण्या हेच हात ।
अन्यायाशी लढता लढता बंदूक धरती हेच हात ।
वळणदार अक्षर लिहिण्या लेखन करती हेच हात ।
दोन हात करण्यासाठी वापरती मग हेच हात ।
अभद्र अश्लील भाष्य टाळण्या कानावर मग हेच हात ।
आजार संकट अपघातामध्ये सेवा देण्या हे हात ।
हस्तरेषा अन भविष्य बघण्या ज्योतिषा पुढे हेच हात ।
संत महात्मे चोर डाकुंचे शिल्पकार ते हे हात ।
पायगुणापेक्षा हातगुणाने श्रेष्ठ ठरती हेच हात ।
सत्कर्म तडीस नेण्या सदा अग्रेसर हे हात ।
सतसंगती सतगुणसाठी धरू हातामध्ये हेच हात।
मानव जन्म सार्थक करण्या वापरून घ्या हे हात।
मुत्यु समयी रित्या हाताने निघून जातील हेच हात।
परिस रूपी बहुगुणी हे दिले देवाने दोन हात ।
महत्व सांगून नमस्कार हा निंबा जोडतो हेच हात ।
Leave a Reply