बायको म्हंजे बायको -हास सगळं तिनाच ध्यानमा -हास कोनले कस्स्-कव्हय आनि काय सांगान तिनाच डोकामा -हास..म्हनीसन म्हंतस् बायको म्हंजे बायको -हास…!
सकाय सकायमा आंगनमा सेनपानी ना सडा टाकेल -हास,आनि घरमा देव्हारामा निरांजननी वात,धूप आनि अगरबत्तीना वास घुमत -हास.. म्हनीसन म्हंतस्…!
कव्हय नवरानी कायजी, सासूसासरानी कायजी तर कव्हय पोरस्नी कायजी, रातदिन कायजीच कायजीमा -हास..म्हनीसन म्हंतस्…!
कव्हय कव्हय निरांजनन्या दिवानी वात सारखी शांत तर कव्हय भगभगता टेभांनी मशाल सारखी जहाल -हास..म्हनीसन म्हंतस्…!
चतुर्थी,एकादस आनि सगळा उपास्नादिन,एव्हढच काय घरमानना सगळास्ना वाढदिवस-लगीनना दिन कव्हय शे संमध तिनाच डोकामा -हास.. म्हनीसन म्हंतस्…!
पोरस्ना सायना आनि घरना अभ्यास,तेस्ना वह्याबुकं कोठे रातस हाइ तिलेच माहित -हास..म्हनीसन म्हंतस्…!
नवरानं,सासूसासरानं,पोरस्नं,नातनातूस्नं काय दुखसफुकस एव्हढच काय तेस्ना औसधपानीना टाइमभी तिनाच ध्यानमा -हास..म्हनीसन म्हंतस्…!
फटफटी मी चालावस,मांगेल ती बठ्ठेल -हास पन गाडी कसी चालावो,कुठे देखवो-कुठे नही,मांगलथून गाडी यी -हायनी,समोरथून गाडी यी -हायनी,नेंबन गाडी चालावा अश्या एक नही डझनभर सुचना करत -हास..म्हनीसन म्हंतस्…!
घरना दा-हनवर मना नावनी पाटी -हास पन आख्खा घरमा मातर तिनीच सत्ता -हास..म्हनीसन म्हंतस्…!
मी गावमां जावाले घरमाथून बाहेर निंघस तव्हय हाइ आना ते आना अस्स् सांगत -हास वरथून म्हनस चार ठिकाने भाव करजात बिनकामना पैसा उधळू नका असा हूक्कूम करत -हास..म्हनीसन म्हंतस्…!
कव्हय कव्हय तरासमा म्हनस-फुट्टेल नसीब मन्हं चांगल घर सोडीशीन तुम्हना घर उनू आनि अज्जून टीक्की -हायनू..मंग लाडमा इसीन् मीच काय सगळास्न्या बायका हाईच म्हंत्तीस अस् भी सांगत-हास..म्हनीसन म्हंतस्…!
फटफटीमा पेट्रोलकरता मी महिना अखेरले रद्दी इकाले काढस् तव्हय-राहू द्या ती रद्दी संगाउ द्या आनि शंभरनी कोरी नोट हातमा ठेवस्..म्हनीसन म्हंतस्…!
दोन्ही हातथून मी पैसा उधळत -हास,ती मातर पै-पै ना हिसोब ठेवस..दूधवाला-पेपरवालाना खाडा,भांडावालीनी दांडी तिनाच डोकामा -हास..म्हनीसन म्हंतस्…!
आॕफिसमा कोनता तरी कोपरा मा नवरा काम करत -हास,पन मना नवरा मोठ्ठा साहेब शे अशी गल्लीमा टिमकी वाजाळत -हास..म्हनीसन म्हंतस…!
वरथे वरथे मनमा भलताच राग -हास तरी भी सगळास्नी कायजी करत -हास..म्हनीसन म्हंतस्…!
आनखी काय काय सांगू, अज्जून गहि-या गोष्टी व्हतीन पन एक गोट मातर खास्समखास्-ती म्हंजे तिना नवरा बिन्ध्धास् -हास..बिन्ध्धास् -हास..म्हनीसन म्हंतस् बायको म्हंजे बायको -हास!~~~~~~
कविता लेखन – प्रा.सी.डी.साळुंखे,चोपडा -धुळे.
Very nice and meaningful poem. Happy marriage anniversary to both of you
लग्न तिथी न्या हार्दिक शुभेच्छा. तुम्हणा संसार आनंदि, सुखरूप जावो असी शुभ कामणा.
सुंदर व अप्रतिम कविता आहे सर !
सहजभाव प्रदर्शन, सांसारिक नैतिक मुल्यांच्या अंगीकृत भावभावनांचे स्री सुलभ सुंदर अविष्कारांचे अप्रतिम प्रगटीकरण तेही खास अहिराणी भाषेद्वारा असल्याने ‘बायको म्हणजे बायकी र्हास’ ही कविता अहिराणीचा ठेवा आहे!/डाॅ.दिलीप बडगुजर
सर्वांचे मनःपूर्वक धन्यवाद
असेंच प्रेम यापुढेहि असूं देत ही विनंतीll
पुनश्च धन्यवाद-आभार-शुक्रिया-थँक्स्-आनि गैरा गैरा म्हंजे गैर्रा आभारll