🚩देवांचा🙏राजा🙏इंद्र🚩 -बडगुजर. इन

• 

🚩देवांचा🙏राजा🙏इंद्र🚩
देवांच्या राजाचे नाव इंद्र आहे,असें म्हटले जाते, पण, दत्त पुराण आणि दत्त माहात्म्याच्या वाचनानंतर कळून आले कि हे एक पद आहे.कोणत्या मन्वंतरात कोणाची इंद्रपदी वर्णी असेल याचे वर्णन दत्त पुराणात समग्र आले आहे.आयु राजाचा मुलगा नहुष.या नहुषाला मनुष्य देहाने इंद्रपदावर बसण्याचे भाग्य लाभल्याचा उल्लेख दत्त माहात्म्यात आहे.
इंद्र देवांचा राजा जरी असला तरी प्रत्येक ठिकाणी आलेल्या वर्णनात त्याने आपल्या मर्यादेचे पालन करीत एक आदर्श घालून दिलेला दिसून येतो. अनेक छोट्या छोट्या घटना ज्या या इंद्राच्या विनम्र आणि मर्यादाशील स्वभावाचे वर्णन करतात.दत्त महाराज कार्तवीर्याला उपदेश करताना इंद्र आणि गुरु यांच्या संवादाचा कथाभाग आहे . यातील कथाभागात एकदा इंद्र हा गुरूंना भेटावयास आला,वाहनावरून गुरूंच्या स्थानी आला खरा पण दुरून गुरुवर्य दिसताच तो खूप आधीच पायउतार झाला आणि दर्शनाला पायी चालत आला.देवांचा राजा असला तरी गुरु या पदाचा मान इथे तो विसरलेला नाही.
पुढे याच कार्तवीर्याला स्वर्गस्थानी पराक्रम करताना पाहून देवराज इंद्र आणि सर्व देव तक्रार घेऊन आधी भगवान ब्रह्मदेव यांचेकडे गेले,आणि मग ब्रह्मदेवांसहित सर्व भगवान नारायण यांचे वैकुंठलोकी गेले असा क्रम आहे.गुरुचरित्रात गोकर्ण कथेत देखील रावणाची तक्रार घेऊन असाच क्रम आहे,पुन्हा इथे ज्या लोकाची तक्रार करायची त्याच्या जन्मदात्याकडे आधी जाऊन मग त्या सहित सर्वव्यापी भगवंताकडे जाण्याचा क्रम पालन केल्याचे दिसून येते. मी देवांचा राजा आहे तेव्हा थेट भगवान विष्णूंकडे जावे विचार केलेला नाही,आता पुढे वैकुंठ लोकी आल्यावर देखील व्दारपालाना (जय -विजय)आधी कळवून भगवंताच्या आज्ञेने सर्व देव परिवार भगवान विष्णूंकडे वैकुंठात आला आहे.
भगवान नारायणासमोर तक्रार करताना दत्त महाराज आणि भगवान नारायण हे वेगळे नाहीत हे इंद्राला ठाऊक आहे.
इंद्र म्हणतो:
त्वां अवधूत रूपाने l
अर्जुना दिली वरदाने ll
भगवंता,दत्त रूपात दिलेली वरदाने आम्हा देवांना कशी जाचक ठरत आहेत पहा.
पण याच देवराज इंद्राची भूलोकातील घडामोडींवर बारीक नजर देखील दिसून येते,नहुष हुंडासुराचा नाश करण्यासाठी एकटाच पायी चालला आहे हे पाहून इंद्राने आपला रथ सर्व शस्त्रांसहित नहुषाकडे पाठवून दिला.या वेळी इंद्र देवांना म्हणतो,हा आमुच्या काजा चाले l दुखती तयाची पाऊले ll राक्षसांचा नाश हे आपले कार्य नहुष करत आहे तेव्हा याला सहाय्य करणे हे आपले कर्तव्य आहे.
देवांचा राजा असताना देखील विनम्रतेने आपल्या कर्तव्याना चोख राहणाऱ्या आणि नित्य भगवंताचे दर्शन अवश्य करणाऱ्या देवराज इंद्राला नमस्कार!
🚩♨️श्रीगुरुदेव🙏दत्त🚩♨️
🪷🪷🪷🪷🪷🪷🪷🪷🪷🪷🪷🪷🪷🪷

•